منتظراك
ماتتلفت شان الزمن القاسي وراك...
وماتتمهل خلي خطاك بسراع تلحقني
وامسك صبرك وسوقني معاك ...
وماتستعجل شان ماتعتر فوق الحزن
العشتو سنينو ايام بي وراك
وماتتذكر كلمة لالا
خلى حضورك يكون برضاك..
.واوعك تنسي كلمه روحي
لم تنده وبيها أجاوب أقول سامعاك.
..ومنتظراك
خلي خطاي نمشي السكة وتبقي تقالد فيها خطاك
نمشي الرحله ونحكي هنانا وعن ريدتنا
ولحظة كنت كم بتمنى حياتي معاك...
اوعك تفتر من مشاورنا لازم نوصل
بيت الألفة وفيه نقيل ونشرب قهوة ريدنا هناك
ونقعد فوق الرملة نغازل حلم النجمه
ونقلع حقنا من القمره السرقت نورك وحسن ضياك....
وماتتمنى أنت ألمنيه خلى الأمل
يجي ويترجى طالب منك
ماانت الحلم البتمناك
...وينك انت الجوه دواخلي ورايح فيني
اوعك تضهب من الدرب الجابك لى...اكيد برجاك
...ومنتظراك
حسك عينك لو تتخيل انو البينا يصبح ذكرى
او في لحظة اغيب وانساك ...
وافتح مرة دروب احلامك
واعبر بيها اماني هواك
وماتتطوع تقفل باب الالفه البينا طيفك فيني
وعايش جوه بس بتمنى كتير القاك...
وماتتردد خلى عواطفك حيه تغازل صوت الكلمة
الكانت بينا وعد اللقيا وعهد ألجيه وبستناك...
وماتتغير خلى مقامك زي ماكنت
افخر بيك وأنت المافي وشوقي الحاضر يتحداك
...وماتتحير في أيامك لمن تمشي دون ماتحقق ليا المنيه
انت مخير و ماتتأخر مايوم بكره اكيد هو الاجمل من يوم داك ومنتظراك.
صباح محمد الحسن
مارس /2011
ليست هناك تعليقات:
إرسال تعليق