صحيت ذكرى في جواي
بعد مانامت الاحزان
ورحل مني ظن الخوف
وسكنت فيني روح الحق
وطردت مني كل الزيف
بس ياسيدي شن قولنا
قدرنا نقيف!!!
وخاصمت المشاعر بيك
وكت كتلن قلب بينبض معاني الحب
وحاتك زول حفر جواي
مجاري الريد
وسالت دماي حبو
ولاكان الفراق منك ولامني
وقلبك بالحنان مليان
وقلبي رهيف
الاكمان قدرنا نقيف!!!
قدرنا نقيف عشان ماتقعد الفرقه
امل عزال بشوفو الحب ذنب بمسح
معاني التوبه وماعارفين كمان الحب
سلاح قوتنا
وكلام حجتنا
الا..خسارة زمن خائن خلى الفرقة
تقوى علينا عشان مايكون
أملنا ضعيف
وقدرنا نقيف !!!
وبقولك مره اعزرني
لو فضل الحراز جواي
غباش فرقة ونشاف ذكرى
محال ماتبتق الاشواق خدار فيهو
خصامو معاك
انك مطر البريدو خريف
وقدرنا نقيف !!!
وماتلومت يوم فيك
عشان تتلوم الاقدار
ولاحسيت نهار الريد تفوت شمسو
ويزورو غمام عشم كضاب
سحابة صيف
وقدرنا نقيف!!!
ولابدلت يوم حبك
ولاحاولت يوم انساك
ولابلقى اذا ماكست يوم زيك
وكل مامرت الساعات
بدفن الحب علي قبرك
وبكون شاهد عليهو اقيف
وقدرنا نقيف!!!
وبفقدك يوت قمر ليلي السكن جواي
وطلع مني وضو الكون
وبعيش دونك دواخل فرقة من تاني
ظلامها مخيف
و قدرنا نقيف!!!
وبتحمل الم جواي بسن كل يوم
قوانين حسرة تحرمني
وبشيلك ذكرى مظلومة
وكت ماكان قرار الحب علينا عنيف
قدرنا نقيف!!!
صباح محمد الحسن