جيتك متين؟؟؟؟؟

منك طلع وهج الحضور
رقص خواطر الأمكنة
بهجة وسرور جيه ومقيل
عندك صمت وقف الكلام
ضيق مساحات العتاب
سديتو باب (جيتك متين)
وفتحتو باب (بركة الوصل )
وقطعت حبل الشك عديل
خليتها ريدتك ممكنه
وهزمت صوت المستحيل
وصدق معاي شهر الكضب
ابريل متين شهر اللقاء
ومتين مع الناس أنستر
معروفه كذبتو بالدليل
وضحك معاي الق الصباح
واتوسد الحلم النهار
واتوشح الفرح الأصيل
ومشيت معاك مشوار جديد
مالدنيا بيك أيامها عيد
والدهشة بيك ماتحيرت
ماطلتك صبحت خبر صادق أكيد
والدنيا بيك أتنفست واتنهدت
وبكت عليك دموع فرح
واتمددت نشوانه بي جيتك شديد
وفاضت بحور أشواقي ليك
موج وانتظار طمحت مواعين المطر
بلت سهادي عليك نوم
غمدت عيوني عليك سهر
نضمت حروفي أنا بيك كلام
سكتت عبارات السؤال
وريني جيتك يامناي ؟
كلمني بي زمن الحضور؟
وريني طيارتك متين ؟
ادوك تأشيرة الدخول ؟
و جيتك جواب الأسئلة
وخليت حضورك يكون غياب
لي كل معاني الفرقة والهم والعزاب
وسديتو باب الغربة واللوم والعتاب
وفتحت باب
سفرك متين والباقي كم من فرقتك
من هجرتك من رجعتك
مالسه ماكملت لي باقي الحكاية وقصتك
ماشربت شاي ماعارفنا مقدار قهوتك
.ماخلتك لينا الأيام سرقت منانا وبسمتك .....
واتلفحت بيك النجوم
مالقمره ضوت دنيتها واستنتك
وماانت ضويت القمر بي دنيتو بي طلتك ...
وسفرك متين وقبال هناك ماتستريح
وريني بس جيتك متين؟...