بلاهي بيك

هو العندو زيك
ريد منو
شان مرة
يحلم بالرحيل
او يقسى
او يغلط عليك .
..وبلاهي بيك
وانا اصلي منك
حته تنبض بالفرح
.... كلو مااقول
شالها الحزن
القاهو قّّبّل ماشي ليك .
..وبلاهي بيك!!
خليك على قدر الوفاء
وخلى الايام
تبسم حضور
والسكة تتمطى الفرح
تعلن بريق

لحظة مجيك
وبلاهي بيك
وكل مالفراق
وسوس زعل
وحزم الوعود
سهل طريق
خطوات مشيك
تلقاني جايي
عليك سماح
شايلك عفو
قاصد عينيك
وبلاهي بيك
وعينيّ انا

ماظن تكب
حبك دموع
مادام سوادها
دوام مقر

فراشهو ليك
وبلاهي بيك
وانا اصلي

مابقدر الوم
حكم القدر
الخلا ريدي

يكون سحاب
ماصب يوم
فرح ترابي

ولاهطل
بلل محل

ظلم السنين
وكان العشم
يصبح خدار

البهجه بيك
وبلاهي بيك
لكن كمان

انا ديمه
بطمح
ريد وشوق
واروى الجروف
الشاكية من

عطشك دوام
ماصلو انت ..
اياك انا
وماأصلي

 من طينة
حنانك
ومن تعابير

ملامحك
ومن وشيك
وبلاهي بيك

صباح محمد الحسن