الاثنين، 3 فبراير 2014
مقبوله منك فرقتي
يازولة اهدت قلبي ريد
وكانت سبب في حرقتي
ياقصة اقوى من البكا
وياخدعة سرقت فرحتي
ياغيمة كنت رجيتا شوق
رحلت بعيد من دنيتي
.
..يابلسم الشفاء يوم عيت
وكان السبب في علتي
ياغصة في حلق العشم
عمت العيون بي دمعتي
وياريد مشبع بالجفاء
بدل هناي بي حسرتي
ويا طعنة في ضهر الوفاء
ونكران جميل خان عشرتي
يازولة جوه اتمددت
رسمت ملامح وجعتي
نحتت وجودها من الالم
ومسحت رجايا ومنيتي
ماصلو طبعك ديمة زيف
وانا السماح من طبعتي
صباح محمد الحسن 9/ديسمبر
السبت، 6 أبريل 2013
قدرت علىّ
بعد ما جّف نبع الريد
وبعد ما عقّّرت الأشواق
لقيتك جوه في الأعماق
بتشلع ضيّ
وقدرت علىّ
بعد ماشاخت الذكرى..
وودّر عقلي معنى الحب
.. ومات الفرح جواي
أتاريك فيني نبضاً حيّ
وقدرّت عليّ
وماتتأسف السنوات
وكت وقفت فراق بينا
ومابقبل عزر لليوم
لمن بخّلت الساعات
وسرقت كل حنانك لي
وقدرت على
غريبة ظروفك الجاحده
وعنيده البهجة لما
تصرو ويشها
ويقيف بينا
الفراق عارض
ودون اسباب الاقى
الفرحه تحّدر لي
وقدرت علىّ
وطربت ليك مشاعري غنا
ورقص فيني كم احساس
وصفق شوقي مال طربان
وكت ماقلت حنّا على
وقدرت على
تصدق
بعد خاصمت كل الريد
وبعد حديت سواد وجفا
وبعد قفلت ابوابي
وزعِلّت على الحصل
والكان
لقيتو هواك بلّوح لي
وقدرت على
وماتلفت لا اترددت
جيتك شوق
وصنقعت وحمدت الرب
ودنقرت عليك ترحاب
حبابك زول ملانى سماح
وماعون الفرح دفق
وطمح الحنين
فاض بي
وقدرت على
صباح محمد
الحسن
الثلاثاء، 2 أبريل 2013
بتحداك
بتحداك لوتقدرتحبس
الشوق يكون جواك
وبتحداك
تعيش فد يوم
وطيف الذكرى
مايغشاك
وبتحداك
لوممكن تداري
الريد
وماتهزمك
عيونك
يوم وتحكي هواك
وبتحداك
لو الايام تطاوعك
يوت
وليل الفرقة مايغشاك
وبتحداك
لو جاء اليل
ونمت سعيد
وجرح الفرقة
ماصحاك
وبتحداك
لو طلّ
الصباح فرحان
وشرقت فيك شمس
الريده وانت براك
بتحداك
لوتقدر تواصل
سكة المشوار
وماتشتاق
اكون في حداك
وبتحداك
لوتقدر مرة تنساني
وتعيش باقي
العمر لسواك
وبتحداك
يتسأل ليه عشان
البينا ماهين
ومهما طالت
القسوة بكون
في رجاك
بتحداك
صباح محمد الحسن
الاشتراك في:
الرسائل (Atom)